Tuesday, March 28, 2017

ശരിയും തെറ്റും


കളിക്കുടുക്കയില്‍ ചിത്രങ്ങള്‍ നോക്കി അതില്‍ ശരിയായ കാര്യം ഏത്, തെറ്റായ പ്രവര്‍ത്തി ഏത് എന്ന് കണ്ടെത്തുന്ന പേജ്.

ഒരു കൊച്ചുകുട്ടി പൂവിട്ട് നില്‍ക്കുന്ന ഒരു ചെടിയ്ക്ക് വെള്ളമൊഴിക്കുന്ന ചിത്രം കാണിച്ച് ദേവുവിന്‍റെ ചോദ്യം.

"ഇത് എന്താ അച്ഛാ?"

"അത് ശരിയാണ്". 

ദേവുവിന്‍റെ കണക്കുകൂട്ടലില്‍ അത് തെറ്റാണെന്നായിരുന്നു എന്ന് എനിക്ക് മുഖഭാവത്തില്‍ നിന്ന് വ്യക്തമായി.  ആ തോന്നല്‍ വ്യക്തമാക്കുന്ന രീതിയില്‍ തുടര്‍ന്നുള്ള സംസാരം.

"അത് ശരിയല്ല..." 

"അതെന്താ ദേവൂ.. ചെടിക്ക് വെള്ളം ഒഴിക്കുന്നതല്ലേ.."

"അതേയ്.. ചെടിയ്ക്ക് ചൂടുവെള്ളം ആണ് ഒഴിക്കുന്നത്."

"ഏയ്.. അത് ചൂടുവെള്ളമൊന്നുമല്ല..." ഞാന്‍ സമ്മതിച്ചില്ല

ആ ന്യായം അധികം നിലനില്‍ക്കില്ലെന്ന് കണ്ട് ഉടനെ ദേവുവിന്‍റെ അടുത്ത ന്യായം

"ചെടിയ്ക്ക് നിറയെ വെള്ളം ഒഴിക്കുന്നതാ..."

കൂടുതല്‍ വിപുലമായ ചര്‍ച്ചകള്‍ക്ക് നില്‍ക്കാതെ ഞാന്‍ പറഞ്ഞ് സെറ്റില്‍ ചെയ്തു.  
ദേവൂന്‍റെ അമ്മ കേട്ടാല്‍ വേറേം പ്രശ്നം ഉണ്ട്.  'ആടിന്‍റെ ഡോഗ് ആക്കുകേം വാദിയെക്കൊണ്ട് കുറ്റസമ്മതം നടത്തിക്കുകേം ചെയ്യുന്ന അച്ഛന്‍റെ നാവ് ബലം മോള്‍ക്ക് കിട്ടതിരിക്ക്യോ?' എന്ന ചോദ്യം കേള്‍ക്കേണ്ടല്ലോ.

പഠനം


ആംഗലേയ ഭാഷ എഴുതിപ്പഠിക്കുന്നതിന്‍റെ ഭാഗമായി അമ്മയും ദേവുവുമായുള്ള ഒരു കസര്‍ത്ത്

A, B കഴിഞ്ഞ് ദേവു D എഴുതിപ്പോയി.
പഠിപ്പിക്കുന്നവര്‍ക്കല്ലേ വേദന അറിയൂ.. ദേവൂന്‍റെ അമ്മയ്ക്ക് ദേഷ്യം വന്നു.  
അല്‍പം ശബ്ദം ഉയര്‍ത്തി

"B കഴിഞ്ഞാല്‍ D ആണോ ദേവൂ.."

ഉടനെ ദേവു റബ്ബര്‍ കയ്യില്‍ എടുത്തുകൊണ്ടുള്ള മറുപടി

"അതിന് ഒച്ച വെക്കുന്നതെന്തിനാ... മാച്ചാല്‍ പോരേ?"

ശരിയാണല്ലോഎന്ന തോന്നലില്‍ ദേഷ്യം ഒന്നടങ്ങിയ അമ്മ ദേവൂനോട് ഒരു ഉപദേശം..

"ഇതൊക്കെ ആലോചിച്ച് എഴുതണ്ടേ?"

ദേവുവിന്‍ അതിനുമുണ്ട് ന്യായം .. 

"അതേയ് അമ്മേ... ഞാന്‍ ആലോചിക്കാന്‍ മറന്നുപോയി."


കൂടുതല്‍ ചര്‍ച്ചയ്ക്ക് സ്കോപ്പ് ഇല്ലാത്തതിനാല്‍ അമ്മ നിശബ്ദയായി.

Sunday, December 6, 2015

ചന്തമില്ലാത്ത ഡ്രസ്സ്


ദേവൂട്ടിയുടെ മുത്തച്ഛന് ഒരു ചെക്കപ്പിന്‍ ആശുപത്രിയില്‍ കൊണ്ടുപോയത് ഞങ്ങള്‍ കുടുംബസമേതമണ്.  അങ്ങനെ ടോക്കണെടുത്ത് കാത്തിരിക്കുമ്പോള്‍ ഒരു പള്ളീലച്ഛന്‍ അവിടെ നില്‍ക്കുന്ന കണ്ടിട്ട് ദേവൂട്ടിക്ക് ചിരി അടക്കാനാകുന്നില്ല.

"അമ്മൂമ്മേ.. ദേ നോക്ക്യേ… ഡ്രസ്സ് കണ്ടോ…"

ആളുകള്‍ ശ്രദ്ധിക്കുന്ന കാരണം ദേവൂട്ടിയെ ഒന്ന് നിയന്ത്രിക്കാന്‍ അമ്മൂമ്മ ശ്രമിക്കുമ്പോഴേയ്ക്കും വീണ്ടും ദേവൂട്ടി ഉച്ചത്തില്‍

"ഒരു ചന്തോം ഇല്ലാത്ത ഡ്രസ്സ് ല്ലേ…."

ഇത്തവണ നാട്ടുകാര്‍ മൊത്തം കേള്‍ക്കുകയും ചിരി പൊട്ടുകയും ചെയ്തു.

ഡയറി മില്‍ക്ക്


ഡയറി മില്‍ക്ക് ആണ്‍ കുറേ കാലമായിട്ട് ദേവൂട്ടിയുടെ പ്രധാന വീക്ക് നസ്.
അതുകൊണ്ട് തന്നെ അതില്‍ നിന്ന് ഒരു പീസ് കിട്ടുക എന്ന് പറഞ്ഞാല്‍ അത്ഭുതകരമായ സംഗതിയാണ്‍.
വലത്തേ കയ്യില്‍ ഒരു പീസ് പിടിച്ച് അത് കടിച്ച് തിന്നുകൊണ്ട് ദേവൂട്ടി കവറോടുകൂടിയുള്ള ഡയറിമില്‍ക്കിന്‍റെ ബാക്കി ഭാഗം അമ്മയുടെ നേരെ നീട്ടി…

ചെറിയൊരു ആര്‍ത്തിയും അതിലേറെ അഭിമാനവും (മോള്‍ക്ക് തന്നോട് അത്രയ്ക്ക് ഇഷ്ടമാണല്ലോ എന്ന അഭിമാനം) തിളച്ച് കയറിയ ദേവൂട്ടിയുടെ അമ്മ അത് 
സ്നേഹപൂര്‍ വ്വം നിരസിച്ചു.

ഉടനെ ദേവൂട്ടിയുടെ പ്രതികരണം..

"കവറ് പിടിക്ക്…"


അപ്പോഴാണ്‍ എന്താണ്‍ ദേവു നീട്ടിയതെന്ന് വ്യക്തമായത്.  

ഇടത്തേ കയ്യിലെ വിരലിന്നിടയില്‍ പിടിച്ചിരിക്കുന്ന ഡയറി മില്‍ക്കിന്‍റെ കവറ് വാങ്ങാനാണ്‍ അദ്ദേഹം ഉദ്ദേശിച്ചത്. ഡയറിമില്‍ക്കിന്‍റെ പീസ് കയ്യിന്‍റെയുള്ളില്‍ ഭദ്രമായി മുറുക്കി പിടിച്ചിട്ടുമുണ്ട്.

Thursday, October 29, 2015

നാളെ


കുറേ നാളായിട്ട് ദേവുവും മിന്നുവും നോട്ടമിട്ടു വെച്ചിരിക്കുന്ന ഒരു ഭംഗിയുള്ള ചെറിയ തലയിണ വാങ്ങിക്കാന്‍ ഇടയായി.  ആ സാഹചര്യത്തില്‍ ഒരെണ്ണമേ വാങ്ങാന്‍ കഴിഞ്ഞുള്ളൂ. ഒരെണ്ണം മതി, ഞങ്ങള്‍ ഷെയറ് ചെയ്തോളാം എന്ന് രണ്ട് ക്ടാങ്ങളും പ്രഖ്യാപിക്കുകയും ചെയ്തു.
“ഇത് ഇന്ന് ഞാന്‍ എടുക്കാം.. ചേച്ചി നാളെ എടുത്തോ, അത് കഴിഞ്ഞ് ഞാന്‍”  ദേവു നിര്‍ദ്ദേശം വെച്ചു.
അന്ന് അങ്ങനെ ദേവു ആ തലയിണയുമായി ഒട്ടിച്ചേര്‍ന്ന് ജീവിച്ചു.

പിറ്റേന്ന്...

മിന്നു വന്ന് തലയിണ എടുത്തു.  “ഇന്ന് എനിക്കാണ്‍”

“അയ്യോ അല്ല... ഇന്ന് എനിക്കാണെന്നല്ലേ പറഞ്ഞേ.. നാളെയല്ലേ മിന്നുച്ചേച്ചിക്ക്”  ദേവു ഉടക്കായി.

“ഇന്നലെ ദേവു എടുത്തില്ലേ.. ഇന്ന് എനിക്കാണെന്നല്ലേ പറഞ്ഞേ..”
മിന്നു വീണ്ടും കാര്യം പറഞ്ഞ് മനസ്സിലാക്കാന്‍ ശ്രമം.

“അല്ല അല്ല... ഇന്ന് എനിക്കാണെന്നാ പറഞ്ഞേ.. മിന്നുച്ചേച്ചിക്ക് നാളെയാന്നാ പറഞ്ഞേ..”


ഇന്നലത്തെ നാളെയാണ്‍ ഇന്നത്തെ ഇന്ന് എന്ന് ഈ കൊച്ചിനെ എങ്ങനെ പറഞ്ഞ് മനസ്സിലാക്കാനാണ്‍.

Sunday, June 21, 2015

വലുതാവല്‍

ആപ്പിള്‍ കഴിക്കാന്‍ ആവശ്യപ്പെട്ടപ്പോള്‍ ദേവൂന്‍ മാങ്ങ വേണം. ഉള്ളതല്ലേ കൊടുക്കാന്‍ പറ്റൂ..  

കുറച്ച് കഴിഞ്ഞ്  നോക്കിയപ്പോള്‍ ദേവു ആപ്പിള്‍ രണ്ട് പീസ് കഴിക്കുന്നു.  

ഒന്നു പ്രോല്‍സാഹിപ്പിക്കാനായി ഞാന്‍ അടുത്ത് ചെന്നു.

"ആപ്പിള്‍ കഴിച്ചാല്‍ നല്ല സ്ട്രൊണ്ട് ആവും.. വേഗം കഴിച്ചോ.."

"അച്ഛനെപ്പോലെയോ?"

"അതെ"

"അച്ഛനെപ്പോലെ വലുതാവോ.. സ്ട്രോങ്ങ് ആവോ??"

"ങാ.. അതെ"

ഉടനെ മുഖത്ത് ഒരു ഇഷ്ടക്കേട് ഭാവം വന്നു.

"വേണ്ട.. എനിച്ച് അങ്ങനെ ആവണ്ടാ.. എനിച്ച് ഇഷ്ടല്ലാ"



(ഉദ്ദേശം മനസ്സിലായില്ല.  ഈ ബോഡിക്കാണ്‍ സ്ടോങ്ങ് എന്ന് ഉദ്ദേശിക്കുന്നതെങ്കില്‍ അത് വേണ്ട എന്നാണോ. വലുതാവാനേ  താല്‍പര്യം ഇല്ല എന്നാണോ.. എന്തായാലും ക്ലിയറ് ചെയ്യാന്‍ പോയില്ല)



Monday, June 8, 2015

സംശയം

ദേഷ്യം വരുമ്പോള്‍ ഡോഗിന്‍റെ പച്ചമലയാളം വിളിക്കുന്ന സ്വഭാവം ദേവൂനും ഉണ്ട്.

പലപ്പോഴായി ഉപദേശങ്ങളും ഭീഷണികളുമൊക്കെ ആയതിനാല്‍ ഇടയ്ക്ക് ദേവു ഒന്ന് നന്നാവാന്‍ ശ്രമിക്കും.
ആ നന്നാവലിന്‍റെ ഭാഗമായി ഇന്നലെ സ്നേഹത്തോടെ വന്ന് ദേവു അമ്മയോട് ചോദിക്കുന്നു. “അമ്മേ.. നായാന്ന് വിളിക്കാന്‍ പാടില്ലാല്ലേ..?”

പട്ടി എന്നതിനെ ഭേദപ്പെടുത്തി നായ എന്ന് ആക്കിയതിന്‍റെ കൌതുകത്തില്‍ ഇതാണെങ്കിലും അഡ്ജസ്റ്റ് ചെയ്യാമെന്ന് തോന്നിയെങ്കിലും ദേവൂന്‍റെ അമ്മ പാടില്ല എന്ന് സപ്പോര്‍ട്ട് ചെയ്തു.

ഉടനെ അടുത്ത ചോദ്യം “പപ്പിക്കുട്ടീന്ന് വിളിക്കാമോ?”

ആ വിളിയേയും നിരുല്‍സാഹപ്പെടുത്തി വിട്ട ദേവുവിനെ മിന്നുച്ചേച്ചി
പപ്പിയുടെ അര്‍ത്ഥം പഠിപ്പിക്കുന്നുണ്ടായിരുന്നു.